МБЖЖ-ға қатысушы банктерде білім беру депозиттерінде табыстылық жоғарылады
АСТАНА. ҚазАқпарат - Білім алу қолжетімдірек бола түсті. Мемлекеттік білім беру жинақтау жүйесінің (МБЖЖ) білім беру жинақтау салымдары бойынша сыйақы мөлшерлемесі өзгертілді. Ақша-кредиттік саясат жөніндегі техникалық комитеттің 2016 жылғы 30 қаңтардағы шешімімен Қазақстан Республикасының Ұлттық банкі ағымдағы жылдың 2 ақпанынан бастап жеке тұлғалардың депозиттері бойынша базалық мөлшерлемені 17 % деңгейінде белгіледі.Бұл туралы «Қаржы орталығы» АҚ баспасөз қызметі хабарлады.Осының негізінде 2016 жылғы 2 ақпаннан бастап МБЖЖ-ға қатысушы банктер білім беру жинақтау салымдары бойынша сыйақы мөлшерлемесін көтерді. Осылайша, бұдан былай ай сайынғы сыйақы мөлшерлемесі жылдық 14 %, ал мемлекеттік сыйлықақы - 5 %немесе 7 % (жеңілдікті санаттағылар үшін) құрады.
Мемлекеттік сыйлықақы мен банктің сыйақысы капиталға айналып, білім беру жинақтау салымдары бойынша табыстылық жылына 19 % құрайды, соның есебінен салымшы білім беру қызметтерін сатып алу барысында шығыстардан 30-40%-ға дейін үнемдейді.
МБЖЖ жүйесі Қазақстан Республикасының әрбір азаматына өзінің не баласының атына білім беру жинақтау салымын ашып, оны келешекте Қазақстанның және шетел колледждері мен ЖОО-ларында оқудың ақысын төлеу үшін пайдалана алады.
Бүгінгі таңда елде 14 000 астам МБЖЖ білім беру жинақтау салымы ашық. Білім беру жинақтау салымының басты ерекшелігі: табыс түрі ретінде мемлекет сыйлықақысына салық салынбайды; білім беру жинақтау салымдары 10 млн. теңгеге дейін Қазақстанның салымдарды кепілдендіру қорының нысаны болып табылады, ең төменгі бастапқы жарна - 3АЕК (2016 ж. 6363 теңге); жинақтау мерзімі - 20 жылға дейін; мемлекеттің атынан бұл жүйенің операторы ретінде ҚР БҒМ «Қаржы орталығы» АҚ-ның 100% кепіл болуымен банктен білім беру кредитін алуға мүмкіндік бар.
Білім беру жинақтау салымын ашу мәселелері бойынша 8 800 080 2828 «Қаржы орталығы» АҚ-ның тегін байланыс желісі арқылы кеңес алуға болады.
