Қарағандылық студенттер баламалы энергия көзіне қол жеткізді
АСТАНА. ҚазАқпарат - Қарағанды Мемлекеттік техникалық университетінің студенттері мен оқытушылары күн электр станциясы арқылы баламалы энергия көзіне қол жеткізді, деп жазады 24.kz. Оның қуаты спортзал мен жоғарғы оқу орнының ауласын жарықпен қамтуға жеткілікті. Студенттер мен оқытушылар қазір күн электр станциясының әртүрлі ауа райында қалай жұмыс жасайтынын бақылауда. Басты мақсат - жауын-шашын кезінде де құрылғының тиімділігін арттыру. Ол үшін күннің жағдайын қадағалайтын арнайы жүйе құрылған. «Екіжақтық модель қуат көзін тек күннің жарығынан ғана емес, жоғарыдағы жарық пен шағылысқан жерден де алуға мүмкіндік береді. Зерттеу жұмыстары кезінде белігілі болғандай, асфальтты ақ бояумен сырласа, құрылғы қуаты көзін 6%-ға көтереді», - дейді жоба жетекшісі Вячеслав Югай.
Технология және байланыс жүйелері кафедрасы қуат көзін үнемдеу технологиясы бағытында 5 жылдан бері жұмыс жасап келеді. Бірнеше үлгі жасалды. Соңғы тәжірибеде, аккумуляторлық батареяларды сутегі өндіру жүйесіне алмастыру шешімі қабылданды. Енді құрылғының үнемшілдігі артып, қызмет көрсету мерзімі ұзарды. Күн электр станциясы сағатына 2 кВт қуат өндіреді. Бұл бірнеше спортзал мен университет ауласын жарықпен қамтуға толық жетеді екен.
Басты сөздер: Білім , ЖОО-лар , Ғылым , Энергетика , Қарағанды облысы
